Lambert and Stamp

Lambert and Stamp
(EEUU, 2014)
Dirección e fotografía: James D. Cooper. Dur.: 117'.
Kit Lambert (clase alta, gai) e Chris Stamp (clase obreira, hetero) decidiron abandonar a súa nacente carreira cinematográfica para ser managers de The Who, nun cambio de terzo laboral que modificaría o pop. Lambert & Stamp é un estudo esencial para entender o modo en que un axente externo pode intervir na carreira dun artista. Grazas a ambos, The Who chegaron a nós como o fixeron; o dúo modelou a grupo e audiencia. Eran todas esas ideas: o de converter o grupo en “espello” da súa guerrilla mod; a énfase na revolta xuvenil e o antiautoritarismo; o de que Townshend compuxese os seus propios temas; a destrución de instrumentos; as apreciacións estéticas fosen o logo do grupo ou o nome (estiveron a piques de se chamar The Hair & The Who, mais a Lambert lle soaba “a pub”); as suxestións sinfónicas e a ópera rock. Foi todo da súa man; mesmo a escolla das cancións. Unha obra fonda, vibrante, inzada de anecdotario e reflexións fondas. Mods, xuventude, rebelión, The Who, clase, pop, arte: unha alegría.