Sesión 7: Perspectivas I

Gente en la playa, Néstor Almendros, 1961, HD. 10’
Hombres del cañaveral, Pastor Vega, 1965, 35mm. 10'
Guantánamo, José Massip, 1967, 35mm. 62'
Madina-Boe, José Massip, 1968, HD. 38'

Esta sesión mostra nunha serie presentada en tres partes a crecente variedade de temáticas e a evolución da ollada deste movemento documental. Gente en la playa, ao coidado de Néstor Almendros, é free cinema en estado puro. Sen comentario e con son ambiente sen sincronizar, a película é un retrato espontáneo de familias facendo cousas típicas dunha familia na praia. O subtexto é que esta polícroma mestura de negros, brancos e mulatos non sería posible antes da Revolución, cando a xente negra tiña o acceso vedado ás praias da illa. Hombres del cañaveral, de Pastor Vega, é un simple día na vida dunha brigada de traballadores voluntarios urbanos na colleita da cana de azucre. O filme reflicte o debate ideolóxico sobre as cualidades morais do traballo nunha sociedade revolucionaria, mais sen mostrar pegada ningunha da rechamante propaganda do panfleto político. Dúas películas de José Massip culminan a sesión. Guantánamo ensina a base naval estadounidense rodada desde o punto de vista dos cubanos da cidade veciña e exemplifica a corrente experimental de mediados da década. Madina-Boe representa outra faceta importante da ideoloxía da Revolución: a solidariedade cos movementos de liberación africanos.