Fóra de serie

Pa Negre (2010), o melodrama de Agustí Villaronga ambientado na posguerra rural catalá da Guerra Civil española e gran triunfador nos últimos premios Goya, ofrécese grazas a un acordo entre a Academia Galega do Audiovisual, institución colaboradora neste pase, e a Acadèmia del Cinema Català, consentindo o visionado do filme na súa versión orixinal catalá. O centenario de Álvaro Cunqueiro rescata traballos inspirados na súa obra ou con intervención súa, fortalecendo a homenaxe tributada durante todo este ano. O número especial que a revista especializada “Secuencias” dedica ao cine no espazo da arte, coordinado por Antonio Weinrichter, devén pertinente na súa revisión dunha das artistas expresión desa flutuación entre museos e festivais de cine, Shirin Neshat, autora do melodrama de mulleres no Irán do golpe de estado de 1953 Women without men, León de Prata en Venecia 2009. Por último, un dos títulos máis loubados dos últimos meses, Carlos, biografía filmada do combatente venezolano pola causa palestina Ilich Ramírez Sánchez, alias Carlos, un proxecto nacido para a televisión como (exitosa) miniserie, concentrado logo nunca versión depurada como longametraxe cinematográfica co aval do seu prestixioso director, o francés Olivier Assayas, ao que hai anos o CGAI lle fixo unha retrospectiva e do que seguimos completando a filmografía.
Agradecementos: Acadèmia del Cinema Català, Academia Galega do Audiovisual, Daniel Sánchez Salas, Alberto Ruiz de Samaniego, Antonio Weinrichter, revista Secuencias.