FESTIVAL FREAKEMACINE

En colaboración con Freakemacine. Festival de Sci-fi e Fantástico (A Coruña).

Cuarta edición dun festival especializado, Freakemacine, certame de cine de ciencia-ficción, terror e fantástico organizado na cidade de A Coruña. Desta vez, un dos seus centros de atención esenciais pasa pola recuperación de clásicos do cine español, fundamentalmente aquel radicado na rica década dos 70. Aproveitamos para recuperarmos títulos de terror ou fantásticos de culto como Pánico en el Transiberiano (1972) de Eugenio Martín, exitosa mestura de ciencia-ficción e terror con reparto de luxo –que inclúe a Christopher Lee, Peter Cushing ou Telly Savalas- e boas cifras de recadación polo mundo adiante; a fábula apocalíptica madura nos vieiros do universo zombi de No profanar el sueño de los muertos (1974) de Jorge Grau, ao tempo que se homenaxea á emblemática parella formada por Jesús Franco (Madrid, 1930) e a súa actriz e compañeira, recentemente falecida, Lina Romay (1954-2012). A proxección de dous dos filmes máis relevantes da súa filmografía, Necronomicón (1967), copia en versión orixinal inglesa xentileza de Filmoteca Española, de préstamo restrinxido e laboriosa procura, e La condesa negra (1973), unha das mellores creacións de Romay, acreditan a importancia do cine do gañador do Goya de Honra en 2009.
As curtametraxes propias do festival (sesións do venres), a sesión galega, constituída pola curtametraxe DSM4 (2012) de Tropa Korriban Star Wars Galicia e a longametraxe de Javier Camino, Maldito bastardo (2008), máis senllos documentais como tributo ás figuras do actor Víctor Israel e mais do director e actor Paul Naschy (El hombre que vió llorar a Frankenstein) completan esta singular e robusta proposta moi capaz de transitar unha parte substancial da historia do cine español de xénero.

Agradecementos: Jesús Franco, Marta Paz, Tonecho Otero, David Pizarro, Diego López, Ángel Agudo, Cristina Bernáldez, Filmoteca Española, Fernando Riera, Vídeo Mercury, Antonio Mayans, Enrique Mesa, Tropa Korriban Star Wars Galicia, Javier Camino.