HISTORIA(S) DE GODARD

A presentación dos últimos traballos de Jean-Luc Godard, Histoire(s) du cinéma e Éloge de l'amour, sérvenos de desculpa para recuperar algún dos seus títulos clásicos dos anos sesenta, desde películas tan coñecidas como À bout de souffle, Alphaville e Pierrot le fou, ata outras de difusión moito menor como La chinoise, Le petit soldat ou Une femme est une femme, así como unha das películas que a principios dos 80 marcou o seu retorno á ficción e lle proporcionou o León de Ouro no Festival de Venecia, Prénom: Carmen.

Servido este aperitivo, a finais de abril terá lugar a presentación da totalidade da serie televisiva, un encargo de Gaumont e Canal+, Histoire(s) du cinéma, en realidade un filme-ensaio que recapitula a historia do cine, ou mellor, a historia do cine desde a perspectiva de Godard, e a relaciona coas demais artes e coa propia historia do século XX. Moitos dos seus achádegos, en particular a súa utilización dos recursos do vídeo, volven estar presentes en Éloge de l'amour, unha exitosa mestura de ensaio e ficción, a primeira película (godardiana) do século XXI.

En colaboración con: Alliance Française e Embaixada de Francia.