La mort de Louis XIV

La mort de Louis XIV
(España, Francia, Portugal, 2016)

Dirección: Albert Serra. Guión: Thierry Lounas, Albert Serra. Fotografía: Jonathan Ricquebourg. Intérpretes: Jean-Pierre Léaud. Patrick d'Assumçao, Marc Susini, Bernard Belin, Irène Silvagni, Vicenç Altaió. Dur: 115’.

O filme, primeira incursión do catalán Albert Serra no idioma francés, protagonizado por un marabilloso Jean-Pierre Léaud (o rapaz de Los 400 golpes de Truffaut), foi estreado en Cannes e recibido cunha grande aceptación da crítica. A lenda do cinema galo interpreta un desgastado Luís XIV no seu leito de morte, nos días previos ao seu pasamento. A cámara de Serra cálmase e adopta un estilo máis sosegado, aparentemente clásico respecto das súas deconstrucións anteriores de figuras coma o Quixote, os Reis Magos ou Casanova, mais non perde un ápice do seu incisivo humor. Quizais cun punto tamén performativo, como en Història de la meva mort (2013), o director de Banyoles semella confiar todo a un maxestoso Leaud, capturado con tenrura e xustiza pola paleta que sobre del pinta o fotógrafo Jonathan Ricquebourg. Un exquisito filme de época da personalidade máis desbordante do cinema español actual.