The Duke of Burgundy

The Duke of Burgundy
(Reino Unido, 2014)

Dirección e guión: Peter Strickland. Fotografía: Nicholas D. Knowland. Intérpretes: Sidse Babett Knudsen, Chiara D'Anna, Monica Swinn, Eugenia Caruso, Eszter Tompa, Zita Kraszkó, Fatma Mohamed, Kata Bartsch. Dur: 104'.

Unha muller que estuda as bolboretas e a couza pon a proba os límites da relación coa súa amante. Día tras día, Cynthia (Sidse Babett Knudsen) e Evelyn (Chiara D’Anna) interpretan un provocativo ritual que acaba con Evelyn castigada nunha sesión de pracer e sadomasoquismo fetichista. Mais cando unha das dúas desexa unha relación máis convencional, a obsesión erótica da outra converterase nunha adicción que poida que leve a relación a un punto sen retorno.

Detrás dun caudal de imaxes exquisitas, acompañadas da banda sonora de Cat’s Eyes (grupo paralelo de Faris, cantante de The Horrors), Strickland agocha un enigmático universo feminino, atemporal e lóbrego, cargado de sensualidade. Un relato sutil e intelixente, nunca explícito, unha película sexual sen sexo.

The Duke of Burgundy tivo a súa estrea mundial no Festival de Toronto e dende entón acumula un exitoso percorrido por festivais coma Londres, Sitges, Filadelfia, Salónica, Viena, París, Turín ou o D’A de Barcelona.

Con tan só tres títulos de ficción, Strickland construíu unha filmografía brillante e de ollada personalísima. Despois de debutar con Katalin Varga (2009) chegaría Berberian Sound Studio (2012), coa que se colocaría á cabeza do relevo xeracional do último cine británico, xunto a nomes como David MacKenzie ou Ben Wheatley. Con esta historia dun sonidista que comeza a ser dominado pola ficción dentro da ficción o director colleitou 17 premios internacionais. (La Aventura)