Dead Slow Ahead

Dead Slow Ahead
(España, Francia, 2015)

Dirección e fotografía: Mauro Herce. Guión: Mauro Herce, Manuel Muñoz Rivas. Dur: 74’.

O director de fotografía de títulos do Novo Cinema Galego como Arraianos (Eloy Enciso) ou Mimosas (2016) estréase como realizador con esta viaxe nun cargueiro que cruza o Atlántico. Filme de grande beleza estética, trátase dun dos documentais españois máis aclamados dos últimos tempos, con premios en Locarno, Las Palmas ou Doclisboa, entre outros certames internacionais de prestixio. O mellor é deixármonos levar polas hipnóticas imaxes, aínda que quen desexe ver na máquina unha metáfora do capitalismo subxugante, terá lecturas abondas nunha película evocadora e que se mostra sen fendas, ao se abrir en diversas direccións. Dead Slow Ahead é ante todo unha experiencia, unha que debe vivirse na sala de cinema para apreciarmos todas as sutilezas deste suntuoso experimento.