Peter Lilienthal

Ampla retrospectiva sobre o cineasta xermano Peter Lilienthal, que se vai levar a cabo en colaboración co Instituto Alemán de Madrid. O ciclo comprende 12 títulos que abarcan desde 1963 ata 1987, entre os que se encontran os seus films máis coñecidos, coa única excepción de Malatesta (1969). Nacido en 1929, en Berlín, Peter Lilienthal emigrou dez anos despois a Montevideo, onde viviu ata 1956. Esta circunstancia, unida ó feito de ser xudeo, influiría decisivamente na súa obra posterior. As súas primeiras películas están feitas para a televisión e son adaptacións de coñecidos autores, tales como Arrabal, Slawomir Mrozek ou Witold Gombrowicz. Algúns deses títulos convirten a Lilienthal nun dos puntais do novo cine alemán e nun dos seus máis significativos cineastas errantes. A súa vinculación con Sudamérica queda patente en películas como La Victoria, Es herrscht Ruhe im Land e Der Aufstand, ambientadas en Chile e Nicaragua. Cineasta político por excelencia, Lilienthal mantén un compromiso constante coa denuncia de toda opresión. De aí a vinculación coa realidade que destilan as súas películas, cun tono case documental que busca, ante todo, a autenticidade.