Douglas Sirk: etapa en Hollywood

Logo de revisar na nosa programación de xuño a etapa alemá de Douglas Sirk, cando o cineasta asinaba co seu auténtico nome, Detlef Sierck, neste inicio de curso achegámonos ás súas dúas etapas en Hollywood, primeiro contratado polo estudo Columbia en 1942, logo na década dos 50 autor dos seus títulos máis recoñecidos para Universal. Sen dúbida, estamos ante unha serie de filmes cheos de talento, moi capaces de xerar atmósferas densas e singulares ao tempo que exhiben os estilemas, preocupacións e temas cruciais da súa filmografía.