Casanova

IL CASANOVA DI FEDERICO FELLINI / CASANOVA
(Italia-Estados Unidos, 1976)
Dirección: Federico Fellini. Guión: Federico Fellini e Bernardino Zapponi, sobre as memorias de Giovanni Giacomo Casanova. Produción: PEA e Fast Film. Fotografía: Giuseppe Rotunno. Intérpretes: Donald Sutherland, Tina Aumont. Duración: 154 min. Libre versión da vida (e memorias literarias) do aventureiro e sedutor italiano Giacomo Casanova (admirable Donald Sutherland). Os recordos e peripecias do personaxe do século XVIII envoltos nunha luxosa produción de capital italiano e estadounidense –kolossal: noventa decorados, mil traballadores, noventa mil metros de negativo rodado, Cinecittá e sete estudos máis implicados, nove millóns de dólares de orzamento, tres reescrituras de guión, milleiros de máscaras,…–, non impiden perpetrar un retrato moi lonxe da exaltación, en realidade unha análise devastadora do ego e do desexo masculinos. Fellini consideraba o filme, produto de tres anos de esforzo, o seu traballo máis completo e valente, un relato (sen narración) amargo e vertixinoso no seu desfile de fantasmas e voo sobre o baleiro do home, testamento precoz. Oscar ao mellor vestiario, David de Donatello á mellor banda sonora (Nino Rota).