As Curtas Parisienses + L´ESSAI

LES DITES CARATIDES
(Francia, 1984)
Dirección e guión: Agnès Varda. Produción: Ciné-Tamaris e TF1. Fotografía: Cyril Lathus. Duración: 12 minutos.
Seleccionada para o Festival de Venecia de 1984, estreada pola televisión francesa, unha visita ás cariátides presentes en París, as estatuas femininas que fan función de columna. Unha curtametraxe documental oportunamente construída en torno ao emprego dalgúns poemas de Charles Baudelaire.

L´OPÉRA MOUFFE
(Francia, 1958)
Dirección, guión e produción: Agnès Varda. Fotografía: Agnès Varda e Sacha Vierny. Intérpretes: Dorothée Blanck, Antoine Bourseiller, José Varela. Duración: 16 minutos.
O caderno de notas dunha muller encinta –estado no que se atopaba Varda durante a rodaxe- no contexto dun documental sobre o barrio de La Mouffe en París. Tenra e respectuosa cos suxeitos filmados, a partitura musical pertence a Georges Delerue.

ELSA LA ROSE
(Francia, 1965)
Dirección e guión: Agnès Varda. Produción: Ciné-Tamaris e Pathé Cinéma. Fotografía: Willy Kurant, William Lubtchansky e Agnès Varda. Duración: 20 minutos.
Documental sobre a orixinal parella formada por Louis Aragon e Elsa Triolet. Aragon, ante fotografías do pasado, lembra a xuventude de Elsa, puntuada polos propios comentarios dela. O actor Michel Piccoli recita os poemas de Aragon.

LE LION VOLATIL
(Francia, 2003)
Dirección e guión: Agnès Varda. Produción: Ciné-Tamaris. Fotografía: Mathieu Vadepied e Xavier Tauveron. Intérpretes: Julie Depardieu, David Deciron. Duración: 11 minutos.
Un divertimento, a narración da historia de amor, aparición e desaparición ambientada na praza Denfert-Rochereau de París entre Clarisse e Lazare, coa presenza dun gato e un particular león.

T´AS DE BEAUX ESCALIERS, TU SAIS
(Francia, 1986)
Dirección e guión: Agnès Varda. Produción: Ciné-Tamaris e Miroirs para a Cinémathèque Française. Fotografía: Patrick Blossier. Intérpretes: Isabelle Adjani. Duración: 3 minutos.
Fragmentos de películas de Feuillade, Duvivier, Eisenstein, Kurosawa, Welles, Godard, Charles Vidor e Truffaut para unha pequena peza conmemorativa do 50 aniversario da Cinémathèque Française que non obvia o papel do público.

LES FIANCÉS DU PONT MACDONALD
(Francia-Italia, 1961)
Dirección e guión: Agnès Varda. Produción: Rome-Paris-Films, Ciné-Tamaris. Fotografía: Jean Rabier. Intérpretes: Jean-Luc Godard, Anna Karina, Eddie Constantine, Jean-Claude Brialy, Sami Frey. Duración: 5 minutos.
Un pequeno segmento burlesco homenaxe ao cine mudo que se integrou na célebre longametraxe de Varda Cléo de 5 à 7 (1962), no momento en que Cléo (Corinne Marchand) entra na cabina de proxección dun cine. Con música de Michel Legrand –vital na película de Varda- e un reparto celebratorio da Nouvelle Vague desenvolve un sketch mudo en torno aos amoríos dun home que sofre cando leva unhas lentes escuras.

L´ESSAI
(Francia, 1984)
Dirección e guión: Agnès Varda. Produción: Ciné-Tamaris. Fotografía: Nurith Aviv. Intérpretes: Yolande de Moreau, Marthe Jarnias. Duración: 27 minutos.
Realizado dentro da exposición Le Vivant et l´Artificiel, concibida por Louis Bec para o Hospice St Louis (Festival de Avignon de 1984), é unha variación sobre o tema cuartos. Vivendas e familias, o tempo transcorre e estimula as lembranzas e as pisadas da vida tamén nos apartamentos baleiros.